諗起一直以來有無數個同學係留言、DM、直播問我「究竟Global Business讀咩架？係咪要瘋狂出埠？」，今日我就一次過解答大家有關CUHK Global Business嘅問題！
CUHK Global Business官網： http://www.cuhk.edu.hk/globe/
1. 入學需知
叫得做「神科」，分數當然要好高先入到！你4C+2X最好39-40分，所以想讀嘅同學仔真喺要加油呀。而且，記得考完IELTS先去報名，因為呢科要求同學要係7月面試前有IELTS 7.0先會收㗎。
在面試上，中大比較注重同學講野有冇sense同埋係未collaborative，所以記得唔好有咩講咩同唔好表現得好aggressive。會有兩輪嘅Interview。第一輪多數係小組報告，要係限時內拆解一間公司嘅問題，再同其他同學一齊present一個解決方案。第二輪就多數睇你性格適唔適合中大Global Business，問問情境題。
大家可能有個stereotype係讀商科嘅同學一定係好鐘意錢。我會話 — 唔一定。唔係每一個讀商科嘅同學都諗住發達、賺大錢的。當然如果你有咁嘅諗法，Global Business實在好適合你。 另外如果你係有家底的，GBUS就更適合你。
撇開較功利嘅睇法。我會話想讀中大Global Business嘅同學最好具備以下3個條件：
1. 主動學習：讀Global Business可以話係無人會Guide住你。尤其讀商科可以選擇嘅Career Path太多，唔似專科咁，所以你需要不斷去接觸新事物，了解唔同行業嘅性質，先知道自己想行嘅路。
2. 外向：始終商科好講人脈，無錯Global Business有好多比你同師兄師姐同前輩交流嘅機會。但如果你係啲唔識嘅人面前會怕羞、唔敢傾計，係meetup嘅時候難免會輸蝕少少。而外向嘅同學肯去識唔同人、聽佢地嘅故事，先可以探索到自己嘅未來路向。
3. 實幹派：(求求你地，我唔想做project再比人freeride啊。) 你做project時肯唔肯學、有無料，係睇得出的。甚至第時如果番iBank Intern要做到凌晨，係十分辛苦的，大家一定要捱得到！
2. 與科目學業有關
CUHK GBUS讀書方面其實同IBBA要讀嘅course差不多（甚至係一齊拉honour添），由於我地唔係好似Accounting, Hotel Management等等係專科，所以各方面嘅商科Course我地都會涉獵到。我地GBUS嘅課程架構主要係跟番中大商學院嘅必修科目，例如Year 1會讀番中學嘅經濟科 (同中學90%相同，無讀過經濟嘅同學會辛苦少少)、讀一個Management嘅Course (主要講講商業管理嘅歷史、領導能力嘅Theory等等，要考試)。到Year 2會讀多啲Technical、計數多啲嘅科目，例如2個Accounting嘅Course (分別講公司對外同對內嘅會計方法)、金融 (Discounted Cash Flow, Stock valuation)、統計學 (會教normal distribution, p-value之類嘅M1數)、市場營銷 (3P、4C、定位之類嘅theory，要做presentation)、生產線管理、資料管理及分析等等。可以話係咩都會掂到。
係中大讀Global Business嘅好處就係你可以好自由咁揀中大其他Faculty嘅科讀，甚至攞埋個Minor，例如我讀左4個Computer Science嘅Course，亦有朋友讀左中文、歷史、統計等等嘅Course，自由度非常大！
承接上面，呢科多個「Global」嘅字，學業上點都會有啲分別嘅！其中一個就係有某啲科 (每年2-3個) 你係會同GBS嘅同學比教授編左去同一班，等你做Group Project嘅時候可以互相搵相識嘅大家幫手，減少被freeride嘅機會。亦都等大家做功課嘅時候可以多啲「學術交流」。
另外GBUS最大特色就係Year 3嘅上半年會去美國嘅University of North Carolina交流半年，係嗰度你會讀繼續讀所謂Soft Skills嘅course (Leadership、Negotiations等等) 。你亦都會有唔少學credit剩可以去讀其他University of North Carolina嘅商科Course，甚至係其他Faculty嘅Course！不過有好多同學反而會選擇讀少啲書，去多啲旅行，反而體驗到更多美國嘅風土人情文化。
另外Year 4嘅上學期亦會有一次嘅交流去丹麥嘅Copenhagen Business School，呢間亦係全世界Top 10嘅商學院。去到嗰邊讀嘅會比較多係分析全球各地做生意嘅方法 (Doing Business in Europe)，等你可以係歐洲學會歐洲人係點樣從商的，都係一個唔錯嘅體驗。CUHK Global Business係呢一年仲會有一個GLOBE Trip，全科18個人一齊去一個地方旅行，等你享受下「Global」周遊列國嘅快感。
3. 科目文化
相信大家係網上論壇都聽講過，其他科嘅學生玩OCamp，中大GBUS係玩OTrip。無錯，係入學前大家已經要同所有同學去一次旅行。除左參觀名勝古跡外，仲會探訪當地嘅大公司。我當年Year 1嘅OTrip去左韓國，參觀左Samsung、延世大學等當地嘅標誌，有機會聽到公司高層嘅分享。
我會話係chur唔chur豐儉由人。不過我自己就覺得：
- 整體有幾chur： ★ ★ ★ ☆ ☆ （整體上唔算chur啦）
- 學業有幾chur： ★ ★ ☆ ☆ ☆ （學業上對比其他科都真係幾輕鬆）
- 氛圍好唔好： ★ ★ ★ ★ ★ （同學、師兄姐都好supportive）
始終Global Business讀書嘅部份相對其他科 (例如Medic、Physics) 係輕鬆好多，對GPA嘅要求都相對寬鬆 (好多人話GPA嘅作用只限於搵第一份工)。如果你要「撈得掂」，你一定要花好多時間主動增值自己或者參加活動。以下淨係介紹CUHK GBUS學生常玩嘅商科活動！
Case Competition係商科學生一個非常Common嘅活動。係咩黎嘅呢？通常以3-4人為一隊，基本上就係有間公司有個問題相解決，佢就會比一份Case你，由5版到30版不等，講哂公司嘅背景、問題、財政狀況等等，然後你要提出解決到問題而又幫公司成長嘅Idea。又或者有啲嘅形式係咩都無，要你由頭根據一個主題諗一個Idea出黎，類似創業比賽。當你有Idea嘅時候，多數嘅形式係你嘅團隊要整一份PowerPoint出黎介紹你嘅Idea，仲要分析所需資金、收益平衡，最後係一班評判面前Present。最有效嘅Idea而又解釋得有說服力嗰一隊就會獲獎啦。係中大有Case Competition Team，俗稱CCT，係Case Competition精英嘅聚集之地。會有前輩嘅指導，亦都會出國比賽。不過要入CCT競爭都唔細，有創意嘅頭腦、豐富嘅分析能力同埋流利嘅英文會幫到你好多！
除左CCT之外，仲有比大家體驗做學生顧問嘅組織，以半年時間幫一間公司起飛。有專注係發展科技公司、初創企業嘅Innovation x Business，搞過好多同科學園、數碼港嘅合作計劃。亦有專注社企、中學生嘅Enactus。仲有由劍橋大學支持，同各類型公司合作嘅Cambridge Consulting Network。
講到實習Internship，Global Business入面完全係由你話事。不過GBUS嘅傳統係大家Year 1已經做Intern (利申：當時一路做Intern一路幫手搞Ocamp)。咩行業都有，自己做左媒體公司。大部份同學去左做大型投資銀行、商業銀行，都有同學做左政府部門Intern、NGO Intern等等。
小編按：今年市道太差，有唔少朋友嘅大公司offer都被收回，所以好多朋友都去左start-up同埋boutique investment firm做。
4. 大學生活
除咗一啲比較商科嘅活動，上莊、住hall呢啲都好多人做㗎。但是由於商科活動已經好多，所以就未必個個都會咁投入U wide嘅活動。
當初揀中大GBUS嘅原因係因為聽人講中大選商科可以彈性高啲，有多啲機會玩商科以外嘅活動，好似上莊、書院活動等等，亦都可以讀商科以外嘅Course。而且中大環境感覺上好啲，讀書壓力「應該」無咁大。(實不相瞞，小弟唔係特別鐘意讀商科，所以我除左Major Required外都無讀過其他商科Course。) 同埋中大GBUS幾吸引嘅係會全科一齊去Exchange，仲會夾埋兩個國家嘅地方一齊過一年半，想瘋狂體驗異地風情嘅我就揀左中大啦！
每屆都有差唔多半科嘅同學會入善衡 (FYI：係中大一個收高分學生嘅書院。) 因為善衡係包住宿，而大家又成日見，就變左好多做project、上莊都會一齊join，所以一啲入唔到或者無入善衡嘅GBUS同學難免一開始會覺得善衡嘅GBUS同學成日都唔預自己咁。但隨住大家各自發展自己嘅圈子、玩唔同嘅function，呢種感覺就慢慢消退。亦都有好多同學係唔同嘅書院玩得更加開心的！
中大Global Business有一個好受歡迎嘅莊，叫Strategic Investment Society (SIS)，成日都有中大GBUS嘅同學組隊上莊仲做埋P。不過入去就唔一定要投資好叻的，多數會搞同唔同社會領袖聯誼嘅活動，等各位同學可以認識到多啲商界嘅人！仲有好多例如品酒班、禮儀班等等嘅活動！
有樣特別嘅喺中大GBS的風氣並唔chur，所以同學之間其實冇咩競爭氛圍，反而會有好多特別嘅共同回憶添。
5. 未來出路
讀GBUS嘅著數從來都唔係讀書上面，而係名聲同人脈。以搵工為例，HR見到你係GBUS學生，總會覺得你嘅質素差極有個譜。雖然講到最大嘅跨國公司，佢唔會理你咩科出黎，而係睇你有啲咩嘅經驗。但係對於一啲中型嘅公司，GBUS呢個名係幾吸引的。(不過你讀得GBUS就唔會將目標set得咁低，多少會aim入大公司，同其他院校GBUS嘅人競爭。所以拉勻番，個優勢其實唔係咁大。)
同埋唔好諗住你讀GBUS，商學院、Professor就會幫哂你手搵network、搵工咁，呢件事絕對唔會發生。你有問題時，佢地可能比啲指引你。要搵工、參加Programme嘅話，你係要自動自覺睇中大嘅電郵或者上LinkedIn或者GlassDoor搜尋，搵有興趣嘅工。但可以好誠實咁同你講，中大GBUS入面競爭都係非常大，大家都會報同一份工、同一個Programme。
中大Global Business 有個幾特別嘅Mentorship Programme，會幫根據每一個同學嘅興趣配對一個Mentor，等你可以更了解你點係某個行業發展、要join咩活動、識咩人。有啲比較aggressive同學甚至會有mentor嘅referral去到大公司做實習！
雖然好多人都以為GBS grad咗人人做Investment bank，但是近幾年都開始越來越多人做consultant同埋tech firm（Google、 Microsoft）。甚至開始有做金融嘅Alumni返黎做mentor嘅時候發現冇咩GBS嘅同學想做金融，差啲冇mentee呀。
希望今日嘅分享可以幫大家揭開中大Global Business嘅神秘面紗，想知更多的話可以Follow呢位現在嘅學生，@ffclassroom！
