今次呢個post嘅內容係講寫DSE中史要注意嘅幾個點～
如果大家想check下有冇溫漏左一啲課題或者驚一啲concept仲係有錯，歡迎係呢到購買我地5**創作者整既「中史科模擬試卷套裝」或係呢到搵 DSE/CE/AL pastpaper !
1. 時間控制
中史某程度上都係一科幾重視「量」嘅科目，所以字速好重要，10分鐘大概要寫到一頁（當然唔係密密麻麻嗰種），40-45分鐘一定要做完一題選答題，45-50分鐘做必答題。
同學千祈唔好顧此失彼，一定要掌握好時間，千祈唔好做漏任何一個分題。要知道你就算有一題寫得好多，你頂盡都係拎多一至兩分。當你嗰題拎滿分，但係如果另一題你做唔切（唔係爭一句嗰啲做唔切，係講緊寫唔切論點），你所失的可能已經係你所有嘅。 反而，平平均均，唔需要話太厲害都可以穩取五級以上。
2. 選題策略
喺選答題同埋卷二方面，揀題目當然要睇你對條題目嘅熟悉度。如果同學係溫一個板塊冇咩題目可以揀，咁你當然就只能夠硬食嗰一題。
但係，如果同學溫書比較全面，識嘅題目比較多嘅時候，好容易就會有選擇困難。同學要留意番自己對邊d分額嘅題目同題型比較熟悉。
例如當日我揀晚清2+2、6、15分題，一方面係因為晚清溫得比較多（btw我都鼓勵大家溫晚清！），另一方面係因為個分額散兼有簡答，容易拎分。
至於我當日揀安史之亂就係因為覺得25分嘅題目可以一氣呵成咁做完，同埋條題目問嘅嘢唔算深。明白同學可能會好驚25分嘅題目，尤其講緊係一氣呵成嘅同時，分分鐘一失足成千古恨，但其實只要你識得分析資料，拆到points，入面嘅論點都有少少論據，其實25分嘅題目唔係你想像中咁難。
3. 答題架構
關於答題架構，必答題同埋低過10分嘅題目，其實都唔需要寫引言同結論只需要單刀直入，逐點鋪陳就可以。就算題目多過十分，其實你嘅引言、結論都只需要簡單寫一句，唔使搞到咁複雜。
每一段嘅開頭記住寫返標示語同主題句係基本。有同學會問TS究竟要點寫，其實唔需要咁複雜，你只需要借助資料同題目就可以。例如2019 Q5c（有資料）可以咁 :
首先，維新運動規模太廣，因而失敗。
其次，維新運動同志太孤/維新派勢孤力弱，因而失敗。
最後，維新運動上又無權/光緒帝無權，因而失敗。
又或者2019 Q2b （無資料）
首先，在政治方面，南朝士族無心政治，因此衰落。（淨係講士族腐化）/ 首先，在政治方面，南朝士族無心政治，才會被削奪門閥權力。（兼論）
其次，在軍事方面，士族鄙棄武職，因此衰落。 / 其次，在軍事方面，南朝士族鄙棄武職，因此才會被剝奪軍權。
有人認為原因一較為重要，寒門君主有意剝奪門閥權力，直接使士族衰落。（略）……
段落入面，記住緊扣題目畀番相關嘅史實， 但唔好一味背，要記住推論同扣題發揮。例如 : 「然而，唐玄宗如資料一言「自以為從此天下太平，大功告成，驕奢淫逸之欲遂起」。他先後寵幸趙麗妃、武惠妃、楊貴妃，縱情聲色，甚至不願早朝，可見其怠惰不理政事習慣形成。*唐玄宗由明轉昏，國家由安轉危，埋下安史之亂的伏線。* （扣題句）」（2019 Q3）
記住用完資料之後，要講返落去佢點樣導致安史之亂爆發。
4. 解讀資料與題目
記住中史科嚟講，佢有畀資料你嘅題目，你就只能夠依資料嘅方向提供史實，唔可以偏離資料。否則，就算你背到天花亂墜、龍飛鳳舞都好，都係冇分。例如2019考評報告有指出好多考生唔能夠回應「虛有其表的軍事力量」（Q6），只能夠講軍事力量點樣弱，當你就算溫書溫得唔熟，但最起碼你都要寫國軍喺內戰初期有「壓倒性力量」 或者估都估到國民黨軍隊初頭人數多過共產黨，唔識都扮識，總之資料叫你做乜就做乜，正如你老細叫你向東，你唔想畀人炒嘅話就唔應該行西。
睇完資料，都要記住睇個題目，兩大要求，缺一不可。近排見到有同學做國共二次合作，明明條題目問你「國共合作原因」，佢以為資料有略提「經過十年廝殺」（Mock）， 就用成段背國民黨圍剿、中共二萬五千里長征。但其實個資料仲有「，而有西安事變，雙方和解……（之後仲有幾句for其他points）」，配合返條題目嚟睇，就知道其實個原因同重心係西安事變。 中共二萬五千里長征係可以提，但應該係作為你喺論點一講西安事變嘅時候，討論前後關係變化（由敵對而合作）嘅一個小論據，最多都係講一兩句，目的係解釋西安事變點解咁重要。
【延伸閱讀】更多DSE Tips| DSE M1&M2考試答題必備概念+伏位
